Fréttir 2024
12/11 2024
50 milljónir í ágóðahlut til aðildarsveitarfélaga EBÍ
Stjórn Eignarhaldsfélagsins Brunabótafélag Íslands ákvað á fundi sínum nýverið að greiddar yrðu út til aðildarsveitarfélaga EBÍ kr. 50 milljónir í ágóðahlut fyrir árið 2024. Hér má sjá skiptingu milli aðildarsveitarfélaganna.
Útgreiðslan byggir á samþykkt síðasta aðalfundar fulltrúaráðs félagsins og því meginmarkmiði fjárfestingastefnu EBÍ að greiða aðildarsveitarfélögunum árlega út ágóðahlut en með þeim fyrirvara að lágmarkaðar séu líkur á að höfuðstóll skerðist við útgreiðslu. Stefnt skal að því að ekki sé greiddur út lægri ágóðahlutur en 50 milljónir og ekki hærri en 250 milljónir.
Árið 1998 markaði upphaf ágóðahlutagreiðslna til aðildarsveitarfélaga EBÍ. Fulltrúaráð félagsins hefur hvatt aðildarsveitarfélögin til að nýta þetta framlag til að stuðla að bættum bruna- og forvörnum í sveitarfélögunum enda hefur það ávallt verið megintilgangur þessa framlags.
Það hefur ávallt verið leiðarljós EBÍ að vera traustur bakhjarl í forvarnarstarfi og láta ávöxtun félagsins renna til aðildarsveitarfélaganna íbúum þeirra til hagsbóta. Það er því afar ánægjulegt að vita til þess að á núvirði hafa verið greiddir út úr félaginu 9,6 milljarðar á þessu tímabili.
14/06 2024
Úthlutun úr Styrktarsjóði EBÍ lokið
Nýlega úthlutaði stjórn EBÍ styrkjum til 15 verkefna í jafn mörgum sveitarfélögum, samtals kr. 8 milljónir.
Styrktarsjóður EBÍ hefur verið starfræktur frá árinu 1996. Samtals hefur verið úthlutað styrkjum að upphæð 226 milljónir að núvirði til 320 verkefna víðsvegar um landið.
Umsóknarfrestur er til 30. apríl ár hvert og hvetjum við aðildarsveitarfélög EBÍ að sækja um í sjóðinn.
Lista yfir úthlutanir sjóðsins frá upphafi er að finna hér.
22/03 2024
Styrktarsjóður EBÍ-umsóknarfrestur til 30. apríl
Styrktarsjóður EBÍ úthlutar á hverju ári 8 milljónum króna til ýmissa framfaraverkefna sveitarfélaga. Aðildarsveitarfélög EBÍ geta sótt um styrk.
Reglur Styrktarsjóðsins eru aðgengilegar hér á síðunni ásamt umsóknareyðublaði. Umsóknarfrestur er til 30. apríl og skal skila umsóknum rafrænt á netfangið brunabot@brunabot.is.
Umsóknareyðublaðið má nálgast hér.
06/03 2024
Ársreikningur EBÍ
Á fundi sínum þann 9. febrúar s.l. samþykkti stjórn EBÍ ársreikning vegna ársins 2023.
Heildartekjur félagsins voru um 156 milljónir og rekstrargjöld 179 milljónir.
Áfallinn fjármagnstekjuskattur á árinu var 33,8 milljónir og tap félagsins því 57,4 milljónir.
Heildareignir félagsins eru tæpir 2,9 milljarðar og eigið fé um 1,8 milljarðar.
Tap félagsins má rekja til frekar lágrar ávöxtunar á fjármagnsmarkaði og þess að gjaldfæra þurfti töluverða upphæð vegna uppfærslu á lífeyrisskuldbindingu sem hvílir á félaginu.
Ársreikninginn í heild sinni má sjá hér.
Nafnvöxtun eigna félagsins var jákvæð um 5,54% en raunávöxtun var neikvæð um 2,28%. Allir eignaflokkar skiluðu jákvæðri ávöxtun nema innlend hlutabréf sem skiluðu -3,09% ávöxtun. Hástökkvarinn í ávöxtun er eignaflokkurinn erlend hlutabréf, en ávöxtun hans var 18,5%. Stærsti hluti eignasafns félagsins, eða um 60%, eru skuldabréf og innistæður með ábyrgð ríkissjóðs og sveitarfélaga en síðan eru það erlend hlutabréf sem eru um 10,7% af eignasafninu og innlend hlutabréf eru um 9,8% safnsins.
06/03 2024
Fjárfestingastefna EBÍ
Fjárfestingastefna Eignarhaldsfélagsins Brunabótafélag Íslands fyrir árið 2024 var samþykkt í stjórn EBÍ þann 9. febrúar s.l.
Litlar breytingar voru gerðar á stefnunni bæði er varðar hlutföll í eignaflokkum. Hlutfall skuldabréfa bæjar- og sveitarfélaga lækkar um 2% en hlutfall ríkistryggðra skuldabréfa hækkar á móti.
Áfram er það meginmarkmið stefnunnar að EBÍ standi undir skilgreindum markmiðum um árlega útgreiðslu ágóðahlutar til aðildarsveitarfélaga EBÍ. Stjórn félagsins er falið að ákveða endanlega upphæð ágóðahlutarins en við ákvörðun hans skal hafa í huga að lágmarkaðar séu líkur á því að skerða þurfi höfuðstól á milli ára.
Eignastýringu félagsins er úthýst til þriggja fjárvörsluaðila sem allir vinna eftir fyrirfram skilgreindum fjárfestingastefnum.
Fjárfestingastefnu félagsins í heild sinni má nálgast hér.